新星爭上位 烏拉圭有利可圖

2020-10-08 10:28:08 来源:网络

另一場世盃南美區外圍賽首輪焦點戰,烏拉圭主場硬撼智利。雖然曼聯新7號卡雲尼今次冇份,但烏拉圭用蘇亞雷斯(圖)以老帶新,麥斯高美斯等新星輪住博上位,相反智利仍要倚賴阿歷斯山齊士(圖)等老將孭飛,相形見絀,加上作客例腳軟,烏拉圭有力旗開得勝。(周五早上6時45分開賽)

烏拉圭老帥泰巴尼斯已掌帥14年,因為多年來堅持重用老班底,換血力度唔大而備受批評,呢位73歲教頭近年亦痛定思痛,逐漸為球隊進行更替。烏拉圭仍有蘇亞雷斯、高甸等老將壓陣,但呢班領袖肩負起以老帶新嘅重任,單睇今次名單,雖然啱啱加盟曼聯嘅另一老將卡雲尼落選,不過仲有喺歐洲打出名堂嘅賓坦古亞、盧卡斯托拉拿、麥斯高美斯及費達歷高華維迪等撐住,其中費達歷高華維迪喺皇馬更站穩陣腳,呢班第二梯隊可望順利接班。

智利靠老將頂檔
相反,智利近年欠缺具實力嘅新星冒起,阿歷斯山齊士(A山)、伊斯拿、維達爾、伊度亞度華加斯等兩捧美洲盃嘅舊班底,依然未變,但個個都至少3張,而且佢哋近年發展都走下坡,其中A山效力曼聯嗰陣冇料到,上年重返意甲加盟國米又傷多過踢,令人失望。睇番智利上屆世盃外最後6場作客,只得1和5負,包括輸畀厄瓜多爾同玻利維亞,見到都唔開胃,而且近6次造訪烏拉圭,只得2和4負未贏過,今仗凶多吉少。
246免费资料大全 天下 小说